ბაბო შარვაშიძე - მემუარები

ჩვენ წინაშეა აფხაზეთის უკანასკნელი მთავრის, მიხეილ შარვაშიძის უმცროსი ქალიშვილის – ბარბარე (ბაბო) შარვაშიძის ფოტოებითა და ცალკეული ჩანახატებით გაფორმებული რვეული, დღიურის ტიპის ჩანაწერებით.

ბაბო შარვაშიძე (დაბ. 1859 წელს, სოფელ ლიხნიში) უშთამომავლოდ, უსამშობლოდ გარდაიცვალა ქალაქ ლონდონში და თავისი მოგონებების წიგნი სახსოვარივით დაუტოვა მოხუც, ერთგულ მეუღლეს, ალექსანდრე მეიენდორფს. მთავრის ქალიშვილის ავტობიოგრაფიული, თანმიმდევრული თხრობა უკვე ხანდაზმულ ასაკში არა წარსულისგან თავის დაღწევის, არამედ დროის გადასახედიდან წარსულის მოვლენათა შეფასების მცდელობაა და უნიკალურია თავისი მნიშვნელობით. ის ერთგვარი ილუსტრაციაც შეიძლება გახდეს ურთულესი, გარდამავალი ეპოქის რეალიების გაცოცხლებისათვის, თუნდაც ქართულ-აფხაზური ურთიერთობების ნიუანსების ახსნისათვის. (ნინო ხოფერიას ბოლოსიტყვაობიდან)

ინგლისურიდან თარგმნა, კომენტრები, შენიშვნები, გენეალოგიური ტაბულები და საძიებლები დაურთო მაია ცერცვაძემ.